Gure ikastetxeko 5. mailako ikaslea den Dasha Oteizak bigarren postua eskuratu du SolidaritARTEA Eskola Marrazki Txapelketaren zortzigarren edizioan! AYUDEMOS A UN@ NIÑ@ GKEk antolatutako lehiaketa honetan, haurrek gatazka belikoek haurtzaroan duten eraginari buruz hausnartu eta adierazpen artistikoaren bidez iritzia emateko aukera izan dute.
Aurtengo edizioaren gaia “Haurtzaroa eta gatazka belikoak. Gerratik bakerako heztea” izan da. Parte-hartzaileek, beste haurren bizitzan gerrak duen inpaktua aztertu eta irudikatu behar izan dute, nazioarteko gatazka desberdinetan –Ukraina, Gaza, Siria, Nigeria, Somalia, Kongoko Errepublika Demokratikoa, Sahel eta Kolonbia, besteak beste– bizi diren adingabeen errealitatea ikusgai eginez.
Dasha Oteizaren marrazkia epaimahaiaren arreta bereziki erakarri duen lanetako bat izan da, gatazken erdian dauden haurrek bizi duten egoera gordina irudikatzeko duen gaitasunagatik. Bere lanaren bidez, ikuslea haurren sufrimenduaz kontzientziatu ez ezik, bakerako bideak bilatzeko garrantziaz ere hausnartzera gonbidatzen du.
Zorionak, Dasha! Zure sormenak eta konpromiso sozialak erakusten dute arteak gizartea hobetzeko duen indarra.
